Vil hava ICES at eftirmeta grundarlagið hjá MSC

Uttanríkis- og Fiskimálaráðið hevur biðið ICES eftirmeta veiðiregluna fyri áseting av fiskidøgum í føroyskum sjógvi. 

Orsøkin er, sigur Bárður á Steig Nielsen, landsstýrismaður, at tey, sum varða av MSC góðkenningum hava gjørt vart við, at hava óheft fakfólk ikki eftirmett umsitingarætlanina og veiðiregluna fyri næsta árliga eftirlitið av MSC góðkenningini í desember, missa tey góðkenningarnar fyri fiskiskapin eftir upsa og hýsu.

Vera fleiri fiskidagar latnir enn veiðireglan sigur, hann tað ávirka úrslitið í eftirmetingini í ICES og arbeiðið hjá vinnuni at fáa MSC góðkenningar, sigur landsstýrismaðurin.

Bárður á Steig Nielsen hevur lógaruppskot um at lata bólki 5B 750 fiskidagar aftrat í ár.

Nógvur smáfiskur

Í fjør avreiddu bátarnir í bólki 5B 1066 tons av toski av landgrunninum.

Tað eru góð 10 prosent av øllum toski, sum var avreiddur.

Fyri stovnsrøktina hevur tað týdning, at bátar í bólki 5 avreiða meira smáan fisk enn hinir bólkarnir í fiskidagaskipanini. 

At verja smáfisk er týðandi fyri burðardygga og skynsama gagnnýtslu, sigur landsstýrismaðurin.