KÍ-dysturin útsettur til í morgin - formaðurin skilir einki

KÍ hevur fingið boð frá UEFA um, at dysturin, sum annars skuldi spælast í kvøld, verður fluttur ein dag.

Pólska ferðalagið var seinkað á veg til Føroya, men lendi í Vágum stutt eftir klokkan trý seinnapartin í dag. Kortini er avgerð tikin um at útseta dystin til í annaðkvøld.

Tummas Lervig, formaður í KÍ, sigur, at felagið hevur fingið boðini frá UEFA seint seinnapartin, og hann stendur spyrjandi, tí hann hevur ikki fingið nakra grundgeving frá UEFA.

KÍ-heimasíðan skrivar, at tey, sum hava keypt atgongumerki, men ikki hava møguleika at koma til dystin í annaðkvøld, kunnu fáa atgongumerkið endurrindað við at venda sær til KÍ.

Dysturin millum KÍ og Lech Poznań verður sostatt á Tórsvølli fríggjakvøldið klokkan 19.