Helmingurin vandi á vøllinum – Aron lendur í Moldova

Føroyska manslandsliðið hevur í kvøld havt sína fyrru venjing í Moldova undan Nations League-landsdystinum í morgin. Bara helmingurin av spælarunum vóru til venjingina. Tað vóru teir, sum ikki byrjaðu inni móti Kasakstan í gjár.

- Teir eru á gistingarhúsinum og venja saman við Magna Mohr. Teir lyfta tungar vektir, sum er gott fyri kroppin eftir dyst, sigur Atli Gregersen, hjálparvenjari hjá manslandsliðnum.

Hinir vandu á einum grasvølli, sum liggur heilt tætt við leikvøllin hjá Moldova. Adrian Justinussen, Jann Benjaminsen og hinir vandu við fullari ferð ferð. Tað bleiv skotið upp á mál, spælt verja móti álopi og spælt dyst.

Upprunaliga skuldi Aron Benjaminsen venja við í dag, men órógv í flogferðsluni gjørdi, at 18 ára gamli vongurin ikki náddi flogfarið til Moldova. Hann hevur tí flogið úr Íslandi til Moldova í dag. Hann er nú komin vegin fram, men náddi ikki at venja við.

- Tær nýst bara at hava sæð Aron spælt í fimm minuttir fyri at skilja, hví vit taka hann við. Hann hevur nakrar eginleikar, sum vit ikki hava í hópinum, men tað var gott, at hann náddi at avgera ein dyst fyri U21-landsliðið fyrst. Tað er fyrstu ferð, at hann byrjar inni hjá teimum, sigur Atli Gregersen.

Føroyar spæla týsdagin klokkan 17 móti Moldova. Sjónvarpið vísur dystin og byrjar at senda klokkan 16.30.