Eldraøkið og fíggingarleistur: Siga einki um kommunusamanlegging

Arbeiðsbólkurin, sum ger uppskot um nýggjan fíggingarleist fyri eldraøkið, skal einki siga um kommunusamanlegging.

Hon er ikki við í arbeiðssetninginum hjá bólkinum.

Í arbeiðsbólkinum eru fólk fyri land og kommunur.

Men tað er greitt, at við øktum trýsti á eldraøkið, verður í framtíðini enn størri tørvur á at hugsa kommunurnar í nýggjum samanhangi, sigur Aksel V. Johannesen, landsstýrismaður í fíggjarmálum. 

Kommunal útjavning

Hann hevur svarað spurningi frá Jóhannisi Joensen, løgtingsmanni.

Hann spurdi um kommunala útjavning og nýggjan fíggingarleist fyri eldraøkið.

Greitt er, at fíggingarleisturin má leggja upp fyri, hvussu økini í landinum vera rakt, so munurin millum økini ikki verður ov stórur, sigur landsstýrismaðurin. 

Arbeiðsbólkurin skal koma við tilmælum seinni í ár.

- Í tí sambandi havi eg heitt á arbeiðsbólkin um eisini at gera eina lýsing av eini blokkstuðulsskipan,  fyrimunir og vansar, sigur Aksel V. Johannesen.