Mest danskt undirvísingartilfar í miðnámsskúlum

Kanningin hjá Tórður Johannesarson byggir á pensumlistar frá miðnámsskúlunum fyri 2012 undantikið mállærugreinirnar.

Kanningin staðfestir, at 78 prosent av øllum frálærutilfarinum var á donskum. Bert 21,5 prosent av tilfarinum var á føroyskum.

Tvær høvuðsorsøkir

Sambært Tórði Johannesarson kunnu vera tvær høvuðsorsøkir til, at so nógv lesitilfar í føroyskum miðnámsskúlum er danskt.

Tann fyrra orsøkin kann vera, at so fáar lærubøkur eru á móðurmálinum. Tann seinna orsøkin, at lærarar eru afturhaldssinnaðir.

Miðnámsskúlalærarar útbúnir uttanlands

Flestu lærarar á miðnámi hava nomið sær útbúgving uttanlands, ið eisini kann gera sítt til, at ikki meira føroyskt undirvísingartilfar verður brúkt.

Undirvísarar kenna best útlendsk fakheiti, og tá ið ein lærubók kemur á føroyskum, kann tað vera møðsamt at brúka føroysk heiti og orð.

Tí kann undirvísingartilfarið kennast fremmant, skrivar Tórður Johannesarson í Miðnámsriti, har kanningin er almannakunngjørd.