Seldi lánsbrøv fyri 1,1 milliard til skuld og hall

Føroya Landsstýri hevur selt fyri 1,1 milliard krónur í nýggjum lánsbrøvum. Sølan gekk skjótt og væl. Longu eftir trý korter vóru øll lánsbrøvini seld, sigur Føroya Gjaldstova.

Tað er Fígging landsins, sum er partur av gamla Landsbanka Føroya, og Nordea Bank, sum hava staðið fyri søluni. Lánsbrøvini vórðu seld umvegis Bank Nordik, Eik Banka og Norðoya Sparikassa. 

Nýggja lánið skal rindast aftur 20. juni 2019 og er eitt standandi lán við fastari rentu. Effektiva rentan er 1,779 prosent.

Meginparturin av peninginum skal nýtast til at rinda skuld aftur, ið fellur til gjaldingar 7. apríl 2014 og 11. juni 2015 og til at fíggja gjaldførishall í  2013 og 2014.

Nýggja lánsbrævarøðin verður listað 1. apríl 2014 á keypsskálunum í Íslandi og Keypmannahavn.