Norskt línuskip í føroyskum sjógvi

Higartil er bara eitt fiskiskip úr Noregi ella ES komið í føroyskan sjógv, nú aftur er loyvt skipum haðani at royna undir Føroyum.

Norska línuskipið Sjøvær kom í føroyskan sjógv týsdagin.

Fiskiskapinum er einki at reypa av. Sambært Vørn hevur Sjøvær fingið seks tons av longu og trý tons av brosmu.

Einki skip úr ES hevur enn boðað frá áhuga at fiska her, men onkur reiðarí í Noregi hava ringt til Vørn og spurt.

Stríðið um makrelin gjørdi, at síðani 2010 eru norsk skip og ES-skip ikki sloppin í føroyskan sjógv at fiska, tí ongar avtalur um sínámillum fiskirættindi hava verið í trý ár.

Men nú tað lukkaðist at fáa semju um makrelin, eru avtalur aftur gjørdur millum Føroyar og Noreg og Føroyar og ES.