Varðin keypir Rankan frá Realinum

Uppsjóvarfelagið Varðin í Gøtu, sum fyrr í ár setti pening í línuskipið, Eivind, hevur nú keypt djúpvatnstrolaran, Rankan frá Realinum.

Varðin hevur stovnað felagið Hvanngarður, sum hevur 500.000 kr. í partapeningi, og sum skal keypa Rankan.

Ikki í vinnu í eitt ár

Rankin hevur ikki verið í vinnu síðani hann fiskaði makrel í fjør. Skipið fór á tvingsilssølu í vetur, og Realurin keypti skipið fyri 15 milliónir kr. Sum skilst keypir Hvanngarður skipið frá Realinum fyri somu upphædd. David Jacobsen, sum er stjóri fyri virkseminum, Varðin hevur í Runavík, sigur, at ætlanin er, at Rankin skal halda fram við at partrola saman við Suðringi, og at skipini framvegis skulu hoyra heima á Tvøroyri.

Fer skipið at fiska upsa, so er ikki óhugsandi, at Rankin fer at landa til virkið í Runavík, men eingin endalig avgerð er tikin um tað enn, sigur David Jacobsen. Ein orsøk til at Varðin hevur gjørt av at keypa Rankan er eisini, at skipið framhaldandi skal hoyra heima á Tvøroyri.

Gera umvælingar

Áðrenn skipið fer í vinnu, skulu onkrar umvælingar gerast, og skipið skal pussast upp.

Rankin er bygdur á Skála fyrst í 80unum.