Fríkendur fyri ákærur at hava tikið ólóglig lán

Kendi íslendski vinnulívsmaðurin, Jón Asgeir Jóhanneson, er fríkendur í einum sakarmáli, har hann var ákærdur fyri at fingið ólóglig lán úr bankanum, Glitnir, sum seinni fór á húsagang, skrivar DR.

Saman við fyrrverandi stjóranum í Glitnir, Larus Welding, og tveimum øðrum starvsfólkum, var Jón Ásgeir Jóhannesson ákærdur fyri at hava tikið ólóglig lán í bankanum at keypa gullhandlarnar, Goldsmiths í Bretlandi. Talan var um 265 milliónir kr í láni. Og tað hendi bert tríggjar mánaðir, áðrenn bankin fór á húsagang.

Jón Ásgeir Jóhanneson var tá størsti partaeigarin í Glitnir bankanum. Allir fýra vórðu fríkendir.

Tá búskaparkreppan gjørdi um seg í ìslandi, var ein serligur ákæri settur, sum skuldi fáa greiði á búskaparliga kriminalitetinum í landinum.

Verið leingi á veg

Sakarmálið ímóti Jón Ásgeiri Jóhanneson hevur verið leingi á veg, og serligi ákærin, Olafur Thor Hauksson, hevur fyrr sagt við DR, at málið hevði stóran týdning, tí tað var stórt og fevndi vítt.

Jón Ásgeir Jóhanneson var ímyndin av búskapargongdini í Íslandi, tí hann ferðaðist kring heimin og keypti fyritøkur fyri læntar pengar. Hann byrjaði sítt virksemi við Bónus-handlunum, saman við pápanum, men stovnaði seinni felagið Baugur, sum eftir stuttari tíð gjørdi hann til ein av mest múgvandi monnunum í Íslandi.

Í Danmark keypti hann m.a. Magasin, Nyhedsavisen, Merlin, Day Birger Mikkelsen og flogfelagið Sterling, sum er farið á húsagang.

I fjør varð Jón Ásgeir Jóhannesson dømdur eitt ára fongsulsrevsing og at bøta  2,5 milliónir kr. fyri skattasvik. Roknað verður fyri vist, at ákæruvaldið fer at kæra dómarnar, sum nú eru sagdir.