Íslendska lýðveldið var viðbrekið fyrstu árini

Íslendingar eiga ikki at gloyma, hvussu viðbrekið íslendska lýðveldið var fyrstu árini.

Tað sigur íslendski forsetin, Ólaf­ur Ragn­ar Gríms­son, í dag, 17.juni, á 70 ára degnum hjá íslendska lýðveldinum. Ísland tók loysing frá Danmark 17. juni í 1944.

Forsetin sigur við Morgunblaðið, at umráðandi er, at íslendingar geva sær far um, hvussu veikt lýðveldið var fyrstu árini.

Veikur búskapur og stríð um fiskimark

Búskapurin var veikur, og neyðugt var at innflyta allar neyðsynjarvørur. Stríðini um fiskimarkið høvdu eisini stóra ávirkan á tjóðina. Ættarliðið, sum stovnaði lýðveldið, framdi eitt bragd, sum ikki hevur fingið nóg stóra tøkk frá tjóðini.

Ólaf­ur Ragn­ar Gríms­son sigur, at avgerandi er at hava í huga tað, sum fortíðin hevur lært okkum, áðrenn stórar avgerðir verða tiknar um uttanríkismál, - avgerðir, sum kunnu fáa ávirkan langt út í framtíðina, kanska í øldir.

Ráðiligt er ikki at elta rákini, sum broytast ár frá ári, sigur íslendski forsetin Hann sigur eisini við Morgunblaðið, at úrslitini, Ísland hevur nátt síðani 1944, eru so avgerandi og stór, at støðið undir framtíðini hjá íslendsku tjóðini er dyggari enn nakar tordi at vóna, tá lýðveldið varð stovnað fyri 70 árum síðani.