Faroe Seafood: Fáa nú uppsagnarlønina

Tey, sum arbeiddu hjá Faroe Seafood 3.desember í 2010, tá stóra fiskivinnufyritøkan fór av knóranum, fáa nú sína uppsagnarløn.

Øll lønarkrøv eru góðkend og avgreidd, og nú verður gjørt klárt at flyta fólki pengarnar, sigur Eyðfinnur Jacobsen, bústjóri í trotabúnum.

500 lønarkrøv

Trotabúgvið fekk okkurt um 500 lønarkrøv frá fólki, sum arbeiddu á teimum sjey fiskavirkjunum hjá Faroe Seafood. Talan er um uppsagnarløn. Eyðfinnur Jacobsen sigur, at trotabúgvið hevur nóg mikið av pengum til at øll fáa tað, sum tey eiga tí góðar. Men tað verður kortini uttan rentur fyri tað hálvt fjórða árið, sum er liðið, síðani Faroe Seafood fór av knóranum.    

Fundur um Faroe Seafood verður í Skiftirættinum tann 8.juli, og hann verður væntandi tann seinasti um trotabúgvið. Tá skulu stóru krøvini frá veðhavarunum, Eik Banka og trotbúnum eftir Kaupting, roynast.

Eyðfinnur Jacobsen sigur, at bústjórarnir hava ikki avgjørt enn, um teir fara at mæla Skiftirættinum til at góðkenna krøvini ella vraka tey.

Hesi krøvini hava ikki framíhjárætt. Verða tey góðkend, eru tey at meta sum vanlig krøv. Tá fáa tey tað, sum eftir verður í trotabúnum, so ella so nógv prosent av kravinum.