ES onga formliga fráboðan um svartkjaftabýtið

Eingi formlig boð eru komin frá ES um, at ES ikki longur góðtekur svartkjaftabýtið, sum strandarlondini samdust um fyri átta árum síðani.

Føroyar hava formansskapin, tá strandarlondini fara at samráðast um norðhavssild og svartkjaft í heyst.

Einki frætt

Andras Kristiansen, deildarstjóri í Fiskimálaráðnum, sum er samráðingarleiðari hjá Føroyum viðvíkjandi svartkjaftinum, hevur ikki frætt nakað um, at ES ikki longur góðtekur verandi býtið. Sambært avtaluni, sum kom í gildi í 2006, skulu londini siga frá fyri 1.juli, um tey vilja hava samráðingar um nýggjan býtislykil.

Tá Føroyar og ES tingaðust um føroysku norðhavssildarkvotuna og ES handilsforðingarnar, skal ES hava gjørt vart við, at ES ikki longur góðtekur svartkjaftabýtið, sum kom í 2006. Men hesi tíðindi eru ikki váttað alment.  

Føroyar 26,1 prosent

Sambært avtaluni frá 2006 er ein partur av heildarkvotuni settur av til NEAFC, sum Russland og Grønland so fáa. Av tí, sum strandarlondini hava at býta millum sín, fáa Føroyar 26,1 prosent, ES 30,5 prosent, Noreg 25,7 prosent og Ísland 17,6 prosent.

Men nú vil ES, sum skilst, hava meira í sín part.  Samráðingarnar um svartkjaftabýtið í 2015 byrja í oktober.