Fáa ikki nógv fólk til arbeiðis

Trot á arbeiðsmegi avmarkar byggivinnuna og tilfeingisvinnurnar.

Tað sigur konjunkturkanningin hjá Fíggjarmálaráðnum, sum varð gjørd í farna mánað. 

Nógvar fyritøkur í byggivinnuni og eitt nú fiskivinnuni siga, at teirra virksemi er avmarkað, tí tær fáa ikki nóg nógv fólk til arbeiðis.

Og hesar fyritøkur vænta at skula brúka enn fleiri fólk í næstum.

Byggivinnan í hafti 

Støðan hjá byggivinnuni er batnað so nógv síðani í januar í ár, at vísitalið er hækkað úr 47 upp í 74.

Vísitalið hækkar, tí byggivinnan fær nógv fleiri arbeiði og væntar vaksandi tørv á arbeiðsmegi. 

Men trotið á arbeiðsmegi er eitt haft um beinið hjá nógvum byggifeløgum og hevur verið tað í trý ár nú. 

Ikki príslækkingar

Vísitalið fyri tilfeingisvinnurnar er lækkað nakað, úr 33 í januar í ár niður í 31 í juni. 

Vísitalið lækkar, tí heldur færri fyritøkur enn í januar vænta størri framleiðslu. 

Nakrar fyritøkur hava brúk fyri fleiri arbeiðsfólkum, aðrar fáa ov lítið av fiski.

Flestu fyritøkurnar í tilfeingisvinnunum vænta at selja fyri somu prísir ella hægri prísir næsta árið.