ES-boykottið ikki strikað í hesari vikuni

Tað verður ikki í hesari vikuni, at ES strikar boykottið móti makreli og norðhavssild úr Føroyum.

Men møguliga í næstu viku.

Tað seinasta, sum føroyska sendistovan í Brússel hevur frætt um ES-nevndina er, at nevndin avgreiðir málið 18.august, tað er um eina viku.

Skal staðfestast

Seint seinnapartin 31.juli samtykti ES-nevndin fyri fiskivinnu og aling at taka undir við uppskotinum hjá ES-nevndini um at strika handilsforðingarnar móti makreli og norðhavssild úr Føroyum. 

Avgerðin er tó ikki endalig enn. Hon skal eisini formliga góðkennast í ES-nevndini. 

Tað kann gerast við skrivligum samskifti millum ES-nevndarlimirnar. 

Síðani fer reglugerðin um at taka av handilsforðingarnar í ES-kunngerðablaðið. Og hon kemur í gildi dagin eftir, at hon er kunngjørd. Kunngerðablaðið hjá ES kemur út hvønn dag frá týsdegi til leygardag. 

Nú handilsforðingarnar hjá ES verða strikaðar, sleppa Føroyar báðum gerðarrættarmálunum móti Evropasamveldinum.