Jørn A í Føroyum, men bara einans sending

Tað Heilsufrøðiliga starvsstovan veit, er bara ein sending av vørum frá Jørn A. Rullepølser komin til Føroya, og hon er fyribeind.

Í Danmark eru 20 fólk vorðin illa sjúk av rullupylsu frá Jørn A. Rullepølser. Nøkur teirra eru deyð.

Listeria bakteria í rullupylsuni er orsøkin til, at fólk gerast sjúk av rullupylsuni.

Heilsufrøðiliga starvsstovan kannar, um vørur frá Jørn A. Rullepølser eru komnar til Føroya.   

Higartil veit Heilsufrøðiliga starvsstovan bara um eina einstaka sending, sum er komin til Føroya, og innflytarin hevur longu beint fyri vøruni. 

Hevur onkur vøru frá Jørn A. Rullepølser, eigur hon at verða burturbeind ella latast handlinum, har hon er keypt, aftur.

Danskir myndugleikar kanna framvegis málið. Og Tilbúgvingarbólkurin á Heilsufrøðiligu starvsstovuni fylgir við í tí, sum hendir í Danmark, og setur neyðug tiltøk í verk í Føroyum.