Færri roykja og fleiri røra seg

Færri roykja hvønn dag, og samstundis er fleiri farin at røra seg.

Tað vísir kanning, sum Gallup hevur gjørt fyri Fólkaheilsuráðið.

Kanningin vísir, at tey, sum roykja hvønn dag, eru seks prosent færri nú. Talið er farið úr 28 niður í 22 prosent.

Fleiri røra seg

Kanningin vísir eisini, at meiri enn triði hvør føroyingur rørir seg fýra ferðir um vikuna ella meira, tað eru 36 prosent.  Harumframt røra onnur seg eina til tríggjar ferðir um vikuna, so tilsamans røra tríggir av fýra føroyingum seg regluliga, vísir kanningin.

Pál Weihe, formaður í Fólkaheilsuráðnum, sigur, at nú gongur rætta vegin. 

- Vit eru í eini tíð, har fólk eru sera tilvitað um heilsuna, og rákið sæst aftur í kanningini, sigur hann.