Bara trý fjós lúka krøv um djóravælferð

Nógv fjós í Føroyum eru gomul og niðurslitin.

Sambært Búnaðarstovuni eru bara trý fjós, sum lúka framtíðarkrøvini um djóravælferð. Ikki er óhugsandi, at um stutta tíð vera nógv færri fjós, og tey flestu, ella øll, vera robottfjós. Sambært Búnaðarstovuni eru stívliga 60 prosent av fjósunum í Føroyum eldri enn 30 ár, og bara sjey eru yngri enn tíggju ár. 

Grannskoðanarvirkið NUMO hevur aftur greinað almennu roknskapirnar fyri árini 2009 til 2013 hjá bóndum, sum lata Mjólkarvirki Búnaðarmanna mjólk. Niðurstøðan er, at í miðal eru ársúrslitini positiv øll árini uttan í 2009. Men inntøkurnar eru lítlar, og lítið er at taka av hjá nógvum bóndum. 

Hava ikki ráð til rímiliga løn

Ein onnur niðurstøða er, at flestu fjósini eru ikki før fyri at lata eina rímiliga løn. Og ábendingar eru um, at 2014 fer at roynast verri enn 2013, sigur NUMO.

Inntøkurnar vuksu nakað í fjør, tí bøndur fingu stuðul at hoyggja fyri. Teir fingu tvey gjøld í fjør, men fáa bara eitt í ár og trý tey næsta árini. Stuðulin endar í 2017. Útlit eru ikki fyri, at fóður og handilstøð gerast dýrari í næstu framtíð. 

Í 2009 vóru 31 bøndur við í kanningini, men bara 26 í fjør, tí nakrir eru givnir. NUMO væntar, at fleiri fara at gevast so við ov við, tí úrslitini eru so vánalig. 

Flestu bóndur hava smápartafelag, men nakrir hava íognarfelag.