Bygnaður í Mentamálaráðnum ørkymlar skúlafólk

Nýggi bygnaðurin í Mentamálaráðnum ørkymlar skúlafólk og onnur, tí ógreitt er, hvønn tey skulu venda sær til, og hvør hevur ábyrgdina av, at fyrispurningar verða avgreiddir.

Tað sigur Rigmor Dam, løgtingskvinna, sum hevur sett Bjørn Kalsø, landsstýrismanni, skrivligan fyrispurning um málið.

Í 2012 varð nýggjur bygnaður skipaður í Mentamálaráðnum, har arbeitt verður í toymum í staðin fyri í deildum. Farið varð frá serfrøðingavitan og greiðum ábyrgdarbýti til ein bygnað, har øll starvsfólk kunnu viðgera øll mál, er tørvur á tí, sigur Rigmor Dam.

Hon vísir á, at hóast vit hava 46 fólkaskúlar við starvsfólki og leiðslum, sum vísa beinleiðis til Mentamálaráðið, er Fólkaskúladeildin niðurløgd. Har starvaðust 6-7 fólk, men nú er einki fast starvsfólk ella deild at taka sær einum av størstu løgfrøðiligu, fyrisitingarligu og námsfrøðiligu uppgávunum í landinum. 

At eingin hevur ábyrgdina av fólkaskúlanum, ger, at fólk kenna seg slept upp á fjall, tí fyrispurningar verða ikki avgreiddir, og fólk verða send frá Peri til Pól, sigur Rigmor Dam í viðmerkingunum til fyrispurningin til Bjørn Kalsø.