Kostráðgevar partur av kommunulæknaviðtalum

Ætlanin er at seta 4-5 kostráðgevar í starv hjá Heilsutrygd, sum koma at virka í kommunulæknaviðtalunum kring alt landið.

Kostráðgeving í nærumhvørvinum er liður í heildarætlanini fyridiabetes, sum varð handað landsstýrismanninum í heilsumálum í fjør.

Týðandi partur av viðgerðini fyri diabetes 2 er holl ráðgeving um kost frá dietisti. Eisini vísa kanningar, at góð kostráðgeving kann vera við at fyribyrgja at fólk, sum eru í vanda fyri at fáa sjúkuna, fáa diabetes.

Tilboð til fleiri sjúklingabólkar

Nýggja tilboðið um kostráðgeving er eisini ætlað fólki við KOL, hjarta- og æðrasjúkum, krabbameini og onnur.

Ráðgevingin um kost á teimum trimum sjúkrahúsunum verður varðveitt, meðan tænastan úti um landið verður styrkt, skrivar Heilsumálaráðið í tiðindaskrivi í dag.