Uppskot um ókeypis endurvenjing á veg

Heilsumálaráðið hevur sent uppskotið um endurvenjing til hoyringar.

Endamálið við uppskotinum er at geva borgarum, sum orsakað av sjúku ella skaða hava mist førleikan, lógarfestan rætt til viðkomandi endurvenjing fyri at endurvinna førleikan.

Ein treyt fyri at fáa rættin til endurvenjing er, at eitt heilsustarvsfólk skal hava staðfest ein tørv. Og rætturin til endurvenjing er galdandi, inntil staðfestast kann, at útlit ikki longur eru fyri, at førleikarnir kunnu batna við framhaldandi endurvenjing.

Kommunurnar fáa rokning

Men meðan sjúklingar kunnu fegnast, stúra kommunurnar. Tær skulu, saman við sjúkrahúsunum, rinda rokningina.

Í fyrstu atløgu skulu sjúkrahúsini veita ókeypis endurvenjingina til tey, ið fáa viðgerð á sjúkrahúsinum.

Síðan skal kommunan taka um endan, tá sjúklingarnir eru útskrivaðir frá sjúkrahúsinum, stendur í uppskotinum.

Einki yvirlit yvir støðuna

Í viðmerkingunum til uppskotið, sum avvarandi partar hava fingið til hoyringar, stendur einki ítøkiligt um, hvussu nógv tað fer at kosta ávíkavist kommunum og sjúkrahúsum at veita lógarásettu tænastuna, tí einki yvirlit er yvir, hvussu nógv fólk í dag fáa tilboðið um endurvenjing, - og ikki minst, hvussu nógv IKKI fáa endurvenjing, sum tey nú væntandi fáa rætt til.

Men meting, sum byggir á tøl frá Danmarks Statistik yvir útreiðslur í Dnamark til endurvenjing og viðlíkahaldsvenjing vísir, at um donsku tølini verða umroknað til føroysk viðurskifti, eigur bruttokostnaðurin at verða 10 - 15 milliónir krónurum árið.