Mótatiltak í ódnarveðri

Skrivað hevur: Katrin Dahl Hanusson

 Hóast ódnarveðrið leikaði í, og stormávaringar ljóðaðu kring landið, so forðaði tað ikki kvinnum (og nøkrum monnum) í hópatali at leita sær oman í SMS til stórt móta og vælverutiltak.

Tiltakið hevði nógv at bjóða so sum mótashow, make-over avdúking, hugleiðing um móta og smakkiroyndir av heilsugóðum mati.

Røddin fekk orðið á tríggjar ungar kvinnur, sum høvdu leitað sær oman til tiltakið

Bjørg Viderø Johannesen

Hugsar tú nógv um, hvussu tú letur teg í? Og hugsar tú nógv um móta?

- Nei, ja, ella… eg lati meg í tað, sum eg føli meg væl í. Í dag er tað bara vanligur hósdagur, so eg havi ikki pyntað meg nakað serligt. Tað mesta av klæðunum havi eg verið í allan dag. Men okkurt havi eg skift, tí eg skuldi oman her.

Hvat heldur tú um slík tiltøk? Geva tey tær íblástur?

- Tey eru ordiliga góð. Her fái eg eitt sindur av íblástri, hvussu eg kann lata meg í, og hvat heystmótin hevur at bjóða. Eg fái ordiligan hug til at fara í handlarnar at keypa mær nýggj klæðir og skifta gerderobuna hjá mær út. Tað er ordiliga gott, at føroyingar seta meira fokus á móta og vælveru

Hvørjum klæðum ert tú í?

- Turriklæðið er frá Sirri. Toppin havi eg keypt á loppumarknaði. Buksurnar og jakkan havi eg keypt í Danmark. 

Rannvá Arnadóttir

Hvørjum klæðum ert tú í?

- Eg eri í arbeiðsblus. Troyggjuna hevur gumma mín bundið. Buksurnar og skógvarnar havi eg keypt á loppumarknaði. 

Hevur móti stóri týdning fyri teg?

- Ja, eitt sindur. Mær dámar væl at finna mín egna stíl. Tað er altíð kul at fara á loppumarknað og finna okkurt øðrvísi. Eg haldi, at stílurin í Føroyum er rímiliga einstáttaður viðhvørt. Men tú sært, at eg havi ein posa í hondini, so okkurt fær mann kortini altíð í Føroyum :)

Krista Áargarð

Hvørjum klæðum ert tú í?

- Jakkin er spildurnýggjur frá YAS. Kjólan og sokkabuksurnar keypti eg í H&M.  Mína cardigan fekk eg fyri ein bíligan penga í Blákrossbúðini. 
 

Hugsar tú nógv um móta?

- Ja, eitt sindur. Eg mangli nýggj klæðir, so tað er fínt at koma oman her at fáa íblástur. Tó keypi eg ikki so ofta klæðir í Føroyum. Tað dámar mær best at gera í Danmark, tí úrvalið har er nógv størri.  Mær dámar eisini væl at ganga í litríkum klæðum - also, í mun til alt tað svarta, sum serliga eyðkennir føroyska klædnastílin. 

Heldur tú, at slík tiltøk mangla í Føroyum?

- Ja, tað tað gera vit. Men tað er helst ikki so lætt kortini. Tað er jú avmarkað, hvat mann kann gera í Føroyum. Verða slík tiltøk gjørd ov ofta, so verður tað helst trupult at fáa fólk at møta upp. Men hetta er ordiliga feitt kortini :)