RöddinLive er jarðað, men okkurt nýtt uppstendur

- Hetta er eitt tiltrongt stig, sigur Birgith Lassen, redaktørur á Röddini, nú útvarpssendingin RöddinLive fer í søguna.

- Málbólkurin hjá RöddinLive er føroyski ungdómurin, men tað vísir seg, at ung lurta ikki eftir útvarpi. Tað verður hildið vera spell at brúka orku, pengar og tíð upp á at framleiða eina útvarpssending, har eingin móttakari er, útdjúpar hon í samrøðu við Hjørdis Kiara Zachariassen, útvarpsvert. 

Í 2013 skrivaði Röddin sáttmála við Kringvarp Føroya, har tað var gjørt av, at Röddin framyvir skuldi vera ungdómspallur Kringvarpsins og harvið taka sær av at miðla til og frá ung. Málini vóru tá at veita dygdargott tilfar um tónleik, list, ítrótt, politikk, samfelag, móta og átrúnað. Birgith Lassen sigur, at málini eru tey somu í dag, hóast tað kann tykjast sum, at tað er eitt afturstig at sløkkja fyri útvarpssendingini. 

Orkan verður framyvir løgd í at framleiða tilfar til heimasíðuna og ikki minst sosialu miðlarnar, har ungdómurin í veruleikanum uppiheldur sær mest sum allatíð. 

- Vit vilja vera ein pallur fyri tey ungu, og tí nyttar tað ikki at brúka miðlapallar, har brúkarin er 30+, sigur Birgith Lassen.  

Eitt tiltrongt facelift

- Nú jarða vit ein part av Röddini, og um nakrar dagar stendur okkurt nýtt og spennandi so upp, sigur Birgith Lassen at enda við Hjørdis Zachariassen. 


Röddin fer nevniliga at fáa eina nýggja heimasíðu síðst í mánaðinum, og eisini verður júst nú síðsta hondin løgd á eina heilt nýggja strategi fyri at røkka málbólkinum á øðrum pallum. 

Redaktiónin