Krabbamein og hjartasjúkur raka føroyingar

Nýggjastu tølini hjá landslæknanum eru frá 2012. Tað árið doyðu 55 menn og 40 kvinnur av krabbameini og 36 menn og 38 kvinnur av hjartasjúkum.

Sjálvmorðini eru sera fá í Føroyum sammett við hini Norðurlondini og Evropa, og talið er ikki vaksandi í Føroyum, heldur tvørturímóti.

Í fjør beindu trý fólk fyri sær, og í ár er skrásett eitt sjálvmorð í Føroyum. Síðani 1981 hava verið 108 sjálvmorð í Føroyum.

Níggju fólk doyðu av vanlukku í Føroyum í fjør, seks teirra í ferðsluvanlukkum.

Fýra tilburðir av tuberklum vóru fráboðaðir landslæknanum í fjør. Higartil í ár er eingin tuberklatilburður fráboðaður í Føroyum. 
Fýra tilburðir eru størsta talið síðani 2000, tá seks tilburðir vóru. Í 2012 vóru tveir tilburðir og tað sama í 2011 og 2010, í 2009 var eingin.
Síðani 1998 eru komnar 26 fráboðanir um fólk, sum høvdu tuberklar. 
Eingin er deyður av tuberklum í Føroyum síðani 1992, tá eitt fólk doyði sambært Heilsulýsing landslæknans.  
Eingin fráboðan kom um HIV í fjør og heldur ikki um eyðkvæmi.
Síðani 2005 er bara ein fráboðan komin um HIV-smittað fólk í Føroyum, tað var ein kvinna í 2011. 
Fyrsti HIV-tilburðurin í Føroyum varð funnin í 1986, og fyrsti tilburður av eyðkvæmi varð fráboðaður í 1989. 
15 menn og seks kvinnur hava fingið HIV smittuna í Føroyum, sjey menn og tríggjar kvinnur hava fingið eyðkvæmi, fimm menn og allar kvinnurnar eru deyð av sjúkuni.