28 vilja fegin hava pengar til gransking

Fríggjadagin verða fyrstu stuðulsjáttanirnar til gransking og menning á heilsuøkinum latnar úr Sjúkrakassagrunninum.
Granskingarráðið, sum umsitur fæið hjá niðurløgdu sjúkrakassunum, hevur fingið 28 umsóknir um stuðul til verkætlanir, sum kann menna heilsuøkið í Føroyum, og samlaða stuðulsupphæddin til hetta er 7,5 milliónir krónur.

Fríggjamorgunin fara Karsten Hansen, landsstýrismaður og Annika Sølvará, stjóri í Granskingarráðnum at almannakunngera í Heilsumálaráðnum, hvør fær pengar úr Sjúkrakassagrunninum á hesum sinni.

19. desember, sum er fríggjadagin, er ársdagurin fyri, nær fyrsti sjúkrakassin í Føroyum varð settur á stovn.