Føroysk lóg kann ikki stýra fíggjarstovnunum

Tjóðveldi vil hava løgtingið at forða fyri, at virksemið hjá eitt nú bankunum í øðrum londum kemur øllum føroyska samfelagnum í váða.

Men meirilutin í Fíggjarnevndini hjá løgtinginum, samgongan, mælir frá at samtykkja uppskotið hjá Tjóðveldi.

Meirilutin heldur ikki, at Føroyar við lóggávu kunnu stýra hesum viðurskiftum nóg væl. 

Samfelagið í vanda

Minnilutin í Fíggjarnevndini, Tjóðveldi og Javnaðarflokkurin, vil hava landsstýrið at koma við lógaruppskoti, sum avmarkar váðan, sum útlendskt virksemi hjá føroyskum fíggjarfyritøkum kemur samfelagnum í. 

Flokkarnir báðir vísa á, at í fjør var føroyska framleiðslan, bruttotjóðarúrtøkan, 15 mia. kr. Men javnin hjá størsta bankanum var 17 milliardir.

Virksemið hjá fíggjarfyritøkum uttanlands kann skjótt gerast stórur fíggjarligur váði fyri samfelagið. 

Møguleiki at avmarka hendan váðan er at krevja, at virksemi er í sjálvstøðugum partafelag.