Útlendskur kapitalur: Eingi loyvi eru sýtt

Fiskimálaráðið hevur einki dømi um, at loyvi eru sýtt, men fleiri dømi eru um, at Fiskimálaráðið hevur mett, at treytir, serliga í partaeigaraavtalum og lánsavtalum, hava ikki samsvarað við treytirnar í lógini um vinnuligan fiskiskap.

Tað sigur Jacob Vestergaard, landsstýrismaður, í svari til Páll á Reynatúgvu, løgtingsmann, sum spurdi um útlendskan kapital og ræðisrætt í fiskivinnununi.

Í flestu førum hevur verið talan um uppskot um avtalur, sum eru lagdar fyri Fiskimálaráðið, áðrenn tær eru endaligar, og tí eru treytirnar í avtalunum broyttar, áðrenn tær eru gjørdar, sigur landsstýrismaðurin.

Fiskimálaráðið og Vørn vita einki um, at Fiskimálaráðið hevur góðkent, at veiðiloyvi, fiskiloyvi og veiðirættindi verða latin feløgum ella flutt millum skip, har útlendskur kapitalur gjøgnum lánsavtalur, pant í skipum ella aðrar avtalur hevur veruliga ognar- og avgerðarrættin á fiskifarinum.

Lógin forðar ikki

Men lógin um vinnuligan fiskiskap forðar tó ikki fyri, at útlendingar veita lán til eigara av fiskifari undir føroyskum flaggi.

Bert ábyrgdarpeningur skal roknast uppí, tá avgerðin verður tikin, um markið er rokkið, hvussu stóran part av føroyskum fiskiførum, útlendingar kunnu eiga. Fiskimálaráðið kannar tó altíð, um tað í láns- ella veðavtalum eru treytir, sum flyta avgerðarrættin til útlendingar, sigur Jacob Vestergaard.

Fiskimálaráðið hevði eftirkanningina um hendi, men síðani 1. juli í fjør hevur Vørn havt umsitingina, tí sparitiltøk vórðu sett í verk í Fiskimálaráðnum.

Jacob Vestergaard sigur, at hann hevur álit á, at umsitingin av lógini um vinnuligan fiskiskap liggur í góðum hondum hjá Vørn.