Skulu ikki gjalda eftirløn av samsýningini

Fólk, sum fáa samsýning fyri at ansa gomlum fólkum ella óhjálpnum heima, eiga at gjalda eftirløn av samsýningini.

Men tað er ikki politiska ætlanin, at tey eiga at gera tað. 

Vansin er bara tann, at lógin, sum sigur, at eftirløn skal ikki rindast av slíkum samsýningum, er farin úr gildi. Hon fór úr gildi á nýggjárinum.

Kemur til viðgerðar í dag

Fyrsta mál á dagsskránni hjá løgtinginum í dag er eitt uppskot frá Fíggjarmálaráðnum um, at samsýningar fyri at ansa eftir fólkum heima við hús framvegis eru undantiknar eftirlønargjaldi, nú kommunurnar hava eldrarøkt og heimarøkt, og tí gjalda samsýningarnar.

Almannamálaráðið boðaði hálvan desember í fjør Fíggjarmálaráðnum frá, at lógin um undantak frá eftirlønarlógini fór úr gildi á nýggjárinum.

Tí bar ikki til hjá Fíggjarmálaráðnum at lata løgtinginum uppskot um broyting, sum skuldi koma í gildi 1.januar uttan at víkja frá øllum freistum. Avleiðingin er, at lógin um eftirløn vísir til eina aðra lóg, sum fór úr gildi 1.januar. 

Samsýning fyri at ansa eldri og óhjálpnum er tí ikki undantikið eftirlønargjaldi longur, sigur Fíggjarmálaráðið. 

Skal hava afturvirkandi gildi

Av tí at talan er um eina lógarbroyting, sum er til fyrimunar fyri borgaran, mælir landsstýrismaðurin í fíggjarmálum til, at broytingin virkar frá 1.januar.

Fær lógarbroytingin ikki afturvirkandi virknað, noyðist TAKS, fyri at halda eftirlønarlógina, at krevja eftirlønargjald av samsýningunum frá 1.januar til dagin, lógarbroytingin kemur í gildi.

Fyri at sleppa undan tí, skal lógarbroytingin tí koma í gildi 1.januar. 

Mál fara í Fíggjarnevndina

Á tingfundinum í dag eru mál til viðgerðar, sum skulu í Figgjarnevndina, fimm uppskot hjá Jørgeni Niclasen, landsstýrismanni, og tvey uppskot til samtyktar hjá Tjóðveldi, annað um fíggjarligt váðaráð, og hitt er um at tryggja Føroyum fíggjarligan haldføran búskap.

Løgtingsfundurin í dag byrjar klokkan tíggju.