Alari: Politikarar halda ikki avtalur

Alarar hildu seg hava eina greiða avtalu við politikararnar um, at gjøldini, sum vórðu løgd á vinnuna í fjør, skuldu vera óbroytt í nøkur ár.

Tí soleiðis tulka alarar niðurstøðuna hjá arbeiðsbólkinum hjá Fíggjarmálaráðnum, Vinnumálaráðnum og Havbúnaðarfelagnum, sum gjørdi eitt upprit um loyvisgjald á alivinnuna.

Atli Gregersen, stjóri í P/f Luna, sigur, at hann var í hvussu so er so naivur at halda tað.

Men nú noyðist hann at ásanna, at hini, sum søgdu, at hetta var bara byrjanin, fingu rætt.

Hetta er skrúvan uttan enda, sigur Atli Gregersen, stjóri í alivirkinum Luna, nú landsstýrið hevur kunngjørt, at millum annað alivinnan skal gjalda meira næsta ár enn í ár.