Russisku matvørumyndugleikarnir siga kortanei

Russiski matvørumyndugleikin krevur váttan frá danska Fødevarestyrelsen, skal fiskur hjá grønlendskum verksmiðjuskipum flytast úr Føroyum til Russlands.

Skal umvegis Danmark

Heilsufrøðiliga starvsstovan hevur greitt fingið at vita frá russiska matvørumyndugleikanum, at Heilsufrøðiliga starvsstovan ikki kann skriva heilsuváttan fyri grønlendska ella danska vøru í Føroyum. 

Skal vøran til Russlands, skal hon hagar umvegis Danmark, so Matvørustýrið sleppur fram at vøruni har, áðrenn heilsuváttan verður skrivað. 

Avtala er við Kina

Arbeitt verður við at fáa eina avtalu millum Føroyar, Danmark og Russland um, at fiskur, sum grønlendsk verksmiðjuskip landa í Føroyum, kann fara beinleiðis til Russlands við heilsuváttan frá Heilsufrøðiligu starvsstovuni.

Slík avtala er gjørd viðvíkjandi Kina. 

Tað sigur Johan Dahl, landsstýrismaður, í svari til Janus Rein, løgtingsmann, sum spurdi um trupulleikarnar hjá grønlendskum skipum, sum landa í Føroyum, at fáa heilsuváttan frá Heilsufrøðiligu starvsstovuni.