Fundur í Keypmannahavn um svartkjaft og sild

Strandarlondini hittast í hesum døgum í Keypmannahavn til samráðingar um svartkjaft og norðhavssild.

Á seinasta samráðingarfundi um svartkjaft í Edinburgh frá 9. - 11. juni varð avgjørt at taka samráðingarnar uppaftur seinni í hesum mánaðinum. Eisini varð semja um at nýta hetta sama høvi til at taka samráðingarnar um norðhavssild uppaftur, eftir at tær vórðu niðurlagdar í London tíðliga í hesum mánaðinum.

Sostatt hittast strandarlondini, Føroyar, ES, Ísland og Noreg eins og Grønland og Russland sum eygleiðaralond, til samráðingar um svartkjaft í dag og í morgin.

Síðani tingast Føroyar, ES, Ísland, Noreg og Russland eins og Grønland sum eygleiðaraland til strandarlandasamráðingar um norðhavssild hósdagin og fríggjadagin.