Nes kommuna fyrireikar bygging av leiguíbúðum

Nes kommuna fyrireikar bygging av leiguíbúðum á Toftum. Íbúðirnar verða bygdar á Kneysum á Toftum - norðanfyri sambýlið Vesturskin. Íbúðirnar liggja væl fyri, beint omanfyri Oyrarnar, við góðum útsýni m.a. yvir havnalagið og bátahavnina, skrivar Nes Kommuna.

Kommunan hevur seinastu tvey árini havt fundir og samskift við Bústaðir við tí endamáli at fáa Bústaðir at byggja leiguíbúðir í Nes kommunu. Á bygdarráðsfundum 22. juni varð samtykt, at Vinnunevndin í Nes kommunu fekk heimild at arbeiða víðari við hesi ætlan saman við Bústaðir. 

Vinnunevndin hjá Nes Kommunu fer eftir summarfrítíðina at leggja fram uppskot um, hvussu ætlanin kann fremjast - herundir fíggjarliga partin hjá Nes kommunu í samband við grundøki og byggibúgving.

Bústaðir verður byggiharri og eigari av íbúðunum, skrivar Nes Kommuna.