Verjan verður skift út

Atli Gregersen hevur leikbann, Bárður Hansen skal upp til sveinaroynd sum elektrikari, Johan Troest er skaddur, og tað er sera ivasamt, hvussu Sonni Ragnar Nattestad er fyri, nú hann er givin í Vejle og venur fyri seg sjálvan í Føroyum.

Lars Olsen, landsliðvenjari, er tó róligur. Hann hevur úttikið nakrar royndar landsliðsleikarar at fylla plássini í verjuni. Talan eru um Rógva Baldvinsson úr Ålgård í Noregi, Jónas Tór Næs úr B36 og Erling Jacobsen úr Víkingi.

Stóri spurningurin er tó, um Sonni Ragnar Nattestad verður á liðnum, sum fer á vøllin móti Norðurírlandi. Nýggir í hópinum eru eisini Víkinga-leikararnir Hanus Jacobsen, ið spælir á vinstra bakki, og áleyparin Finnur Justinussen.