Óvist hví fólkakirkjan missir limir

Færri og færri føroyingar eru limir í fólkakirkjuni. Seinastu 15 árini er limatalið minkað úr 84,3 prosentum niður í 81,6.

- Tað kunnu vera fleiri orsøkir til at alsamt færri føroyingar eru limir í føroysku fólkakirkjuni, sigur Jákup Reinert Hansen, lektari í kirkjusøgu.

- Ein av orsøkunum kann vera, at føroyingar heldur velja samkomur ella fríkirkjur, sigur lektarin á Fróðskaparsetrinum.

Samanborið við londini rundan um okkum, eru lutfalsliga fleiri føroyingar limir í fólkakirkjuni, sigur Jákup Reinert Hansen.

Meðan 81,6 prosent av føroyingum eru limir í fólkakirkjuni liggja tølini fyri hini Norðurlondini millum 67,5 og 77,8 prosent.

Vit hava spurt Jógvan Fríðriksson, biskup, um minkandi talið á limum í fólkakirkjuni, men hann vil ikki gera viðmerkingar til málið í dag.