Kommunurnar í strið við landsstýrið

Kommunurnar vilja hava fult endurgjald fyri skattalættan hjá landsstýrinum. Og tað skal ikki vera við tøkugjaldi og MVG-afturbering, men krónu fyri krónu.

Tað sæst í brævi, sum Kommunufelagið hevur sent landsstýrinum efir ein fund í stýrinum fyri Kommunufelagið í fyrradagin.

Í brævinum sigur Kommunufelagið, at eitt samt stýri í felagnum kann ikki góðtaka ætlanirnar hjá landsstýrinum, so sum tær fyriliggja í løtuni. Kommunufelagið sigur, at inntøkurnar hjá kommununum við uppskotinum hjá landsstýrinum um at hækka botnfrádráttin hjá kommununum úr 30.000 upp í 45.000 kr fer at kosta kommununum 111 mió kr tilsamans.

Kommunufelagið sigur, at tey hava verið á fundi við Fíggjarmálaráðið, og har hevur verið semja um, at skattabroytingin ikki skuldi kosta kommununum nakað, men at kommunurnar skuldu fáa aðrar inntøkur ístaðin.

Tær vísa eisini á, at tær hava lagt seinastu hond á fíggjarætlanirnar fyri næsta ár, og tí ber ikki til at áleggja teimum nýggjar útreiðslur.

Landsstýrið hevur boðað frá, at kommunurnar afturfyri m.a. skuldu fáa part av tøkugjaldinum og fulla MVG afturbering.

Men hetta er ikki nóg gott, tí MVG afturberingin rakar kommunurnar sera ymiskt, og serliga kommunur, sum eru illa fyri frammanundan, fara at missa inntøkur av hesum leistinum. 

Samanumtikið fara kommunurnar sannlíkt at missa 10 tals milliónir í samband við skattalættan, sum landið letur, samstundis sum kommunurnar longu hava latið skattalættar fyri aðrar 10tals milliónir í kommunuskattinum. Tvær tær størstu kommunurnar hava t.d. samtykt at lata útvið 30 mió. kr. í skattalætta, sigur kommunufelagið í brævinum til Fíggjarmálaráðið.