Kommunan vil ikki siga hvat trappan kostar

Í mars samtykti Tórshavnar Býráð at játta góðar 2,7 mió. kr. til nýggju uppihaldstrappuna, sum hon verður nevnd. Smápartafelagið Andrias Berg átti lægsta tilboð, tá arbeiðið varð boðið út.

Teirra tilboð var góðar 2,3 mió. Afturat hesum kostnaðinum koma útreiðslur til ráðgeving og projektering. Sambært tíðarætlanini skuldi meginparturin av arbeiðnum vera liðugt til Voxbotn, ið varð hildið 27. juni.

Síðani skuldi síðsta arbeiðið við trappuni verða liðugt á ólavsøku. Uppihaldstrappan er partur av miðbýarætlanini hjá Tórshavnar kommunu. Partur av arbeiðnum er at fríðka um økið á Bryggjubakka.

Siga talan er um innanhýsis arbeiðsskjøl

Arbeiðið at fríðka um økið á Bryggjubakka skuldi sambært tíðarætlanini verða liðugt í september. Arbeiðið er tó ikki liðugt, og verri enn so. Sambært nýggjastu tíðarætlanini hjá Tórshavnar kommunu verður ikki klárt at leggja trapputrinini fyrr enn í januar.

Eisini el-arbeiðið er nógv seinkað, og byrjar ikki fyrr enn í januar, sambært nýggjastu tíðarætlanini. Tórshavnar Kommuna vil ikki geva innlit í dagførdar kostnaðarmetingar. Tað vil siga, hvat arbeiðið nú verður mett at kosta.

- Talan er um innanhýsis arbeiðsskjøl, ljóðar grundgevingin frá umsitingini hjá Tórshavnar kommunu.