WHO: Zika-virus er á veg til Evropa

Sannlíkindini verða størst at fáa smittuna á Madeira og við landnyrðingspartin av Svartahavinum. Zika-virus spjaðir seg við mýggjabitanum aedes.

Sjúkueyðkennini eru fepur, reyð eygu og høvuðpína, men eini 80 prosent av teimum smittaðu fáa als eingi sjúkueyðkenni.

Hóast WHO sigur, at vandin fyri zika-útbroti í Evropa ikki er so stórur, so er avgerandi, at evropeisku londini seta fyribyrgjandi tiltøk í verk.

WHO: Zika er ein altjóða hóttan

Virussið er vandamikið fyri kvinnur, sum eru við barn, tí illgruni er um, at tað elvir til, at skalli og høvd hjá nýføðingum eru illa búnað og tí kann hava heilaskaða við sær.

Zika-smittan er higartil staðfest í 27 londum, og WHO hevur lýst virussið at verða ein altjóða hóttan.

- Vit mæla staðiliga til, at tiltøk, sum vit vita kunnu fyribyrgja útbroti, verða raðfest, sigur Zsuzsanna Jakab, sum er doktari og stjóri fyri Evropa í WHO, við Danmarks Radio.