Fyribils góðkenning sum hvalvág

Í uppskotinum um nýggja grindakunngerð, sum er sent til hoyringar, er Skálabotnur fyribils góðkendur sum hvalvág. Higartil hava myndugleikarnir ikki viljað givið loyvi til at drepa grind í Skálabotni, tí skitið vatn rann á sjógv har.

23 hvalvágir eru í nýggju kunngerðini og harafturat eru tríggjar, sum fáa fyribils góðkenning. Tær eru millum Flesjar og Hellisenda á Borðoyavík, á sandinum í Skálabotni og á Lygnnesi í Kollafirði. 

Grindakunngerðin er til hoyringar til 18. juli. Hon kemur væntandi í gildi í august.