Chris slapp eina seinastu ferð til París

31 ára gamli Chris Jacobsen, sum datt oman í fjøllunum omanfyri Norðagøtu tann 16. juli í ár, fekk eina seinastu ferð, áðrenn hann varð flogin heim til New Zealands.

Ungi New Zealendingurin hevði ein dreym um at sleppa til París, og ætlanin var eisini, at leiðin skuldi ganga til franska høvuðsstaðin, eftir at Chris hevði verið í Føroyum og vitja familjuna. 

Men Chris Jacobsen var áhalsin og datt oman í fjøllunum omanfyri Norðagøtu. Hann doyði av løstunum.

Bróður Chris Jacobsen, Tim, og kona hansara, Deva, komu til Føroya eftir líkinum, og tey gjørdu av at fara til Fraklands við honum á veg heimaftur til New Zealands.

Tað skrivar heimastíðan "Stuff".

- Tað, hann ynskti sær mest her í verðini  - næst eftir at vera saman við familjuni - var, at sleppa til Fraklands, sigur svigarinnan, Deva, við "Stuff".

- Ætlanin var, at hann skuldi arbeiða á einum skíð-staði í Fraklandi. Hann hevði lært seg franskt, og hann hevði vinir, sum bíðaðu honum har, sigur hon. 

So ístaðin fyri at flúgva heim til New Zealands við líkinum hjá Chris, valdu Tim og Deva at kremera líkið í Danmark og síðani fara til París við øskuni.

"Vit hildu, at hansara ferð var avbrotin í ótíð, og at hann skuldi sleppa til Fraklands. Vit vitjaðu bæði Eifil-tornið og Notre Dame", greiðir svigarinnan hjá Chris, Deva, frá.

Nakað av øskuni hjá Chris varð stroydd í eina stórá í París, og nakað har, hann skuldi havt verið saman við vinum sínum í Fraklandi.

"Vit vildu fullfuggja hesa ferðina, sum var so týdningarmikil fyri hann, tí nú sleppur hann ongantíð at vitja hesi støðini, sigur svigarinnan og leggur aftrat, at hann elskaði at klatra, sigla, svimja og vera úti í náttúruni.

Chris Jacobsen var ein ævintýrari og í fjøllunum í Norðagøtu er ein minningarpláta við orðunum: "Forever adventuring".

Chris Jacobsen verður jarðaður í Wanaka í New Zealandi leygardagin.

Privat mynd