Ósemja um fiskidagarnar

Útlit eru til, at orðaskiftið í Løgtinginum í komandi viku verður hart, tá fiskidagarnir fyri komandi fiskiár skulu samtykkjast.

Vinnunevndin lat í gjárskvøldið tinginum sítt álit um fiskidagarnar, og stór ósemja er millum samgonguna og andstøðuna um, hvussu nógvir fiskidagar skulu verða.

Høgni Hoydal, landsstýrismaður í fiskivinnumálum hevur skotið upp, at fiskidagarnir skula skerjast við 30 prosentum - harav 15 prosent verða lutað útaftur til skip, sum hava brúkt sínar dagar.

Samgonguumboðini í Vinnunevndini - tað er Ingolf Olsen og Bjørt Samuelsen úr Tjóðveldi og Bjarni Hammer úr Javnaðarflokkinum - taka undir við hesum við nøkrum smávegis tillagingum.

Fólkaflokksumboðini í Vinnunevndini, Jørgen Niclasen og Jákup Mikkelsen, liggja langt frá hesum sjónarmiðinum. Fólkaflokkurin heldur ikki, at nøkur grund er til at skerja fiskidagatalið og mælir til sama dagatal sum í ár.

Bjørn Kalsø úr Sambandsflokkinum og Kári Højgaard úr Nýggja Sjalvstýri liggja ímillum hesi bæði sjónarmiðini. 

Teir leggja fram eitt broytingaruppskot um, at fiskidagarnir skula skerjast við 5 prosentum. 

Onnur viðgerð av fiskidøgunum verður mánadagin.