Bíða enn eftir svari

Tórshavnar kommuna noyðist at bíða í minsta lagi ein mánað afturat eftir at fáa at vita, nær danski staturin keypir bankabygningin í Húsagøtu í Havn

Danska fíggjarnevndin hevur framvegis ikki viðgjørt keypið. Nú hevur kommunan fingið at vita, at málið kemur á dagsskránna hjá nevndini tann 6. oktober

Høgni Djurhuus

Bjarni Mohr

06.09.2016 - 17:51

Danska fíggjarnevndin hevur framvegis ikki viðgjørt keypið. Nú hevur kommunan fingið at vita, at málið kemur á dagsskránna hjá nevndini tann 6. oktober.

Tíðliga í august frættist annars, at nú bleiv bygningskeypið hjá danska statinum í Húsagøtu endaliga avgreitt 1. september.

Bygningsstyrelsen í Danmark ætlar at keypa bygningin í Húsagøtu og síðani leiga hann út til politistøð.

SÍ EISINI Bygningurin verður seldur sum ætlað

Tórshavnar kommuna keypti bygningin frá BankNordik hálvan mai 2013 fyri 40 milliónir krónur. BankNordik fekk sínar pengar í januar í ár.

Tann 8. januar í ár, skuldi Bygningsstyrelsen taka við bygninginum tann 1. februar í ár, ella tann fyrsta í mánaðinum eftir, at danska fíggjarnevndin hevur góðkent keypið.

Tað stendur í treytaðu keypsavtaluni millum Bygningsstyrelsen og Tórshavnar kommunu, sum er undirskrivað í Keypmannahavn.