Mál um aliloyvi viðgerast av nýggjum

Vinnukærunevndin hevur staðfest niðurstøðuna frá juni í ár at heimsenda avgerðina hjá Heilsufrøðiligu Starvstovuni um at flyta aliøkini hjá Bakkafrosti á Árnafirði og at víðka aliøkið í Sundalagnum.

Tað merkir, at Heilsufrøðiliga Starvstovan skal viðgera málið av nýggjum. Poul Eiden Müller, hummarafiskimaður, kærdi avgerðina hjá Starvsstovuni at loyva Bakkafrosti at flyta aliøkið longri út á fjørðin.

Tað varð gjørt tí Starvsstovan hevði bara tikið atlit at alivirkseminum og ikki hummaraveiðuni í síni viðgerð. Somuleiðis kærdi Hummaraveiðufelagið avgerðina hjá Starvstovuni um at loyva Bakkafrosti at víðka aliøkið í Sundalagnum.

SÍ EISINI Vilja hava mál viðgjørt av nýggjum

Í juni avgjørdi Vinnukærunevndin at heimsenda avgerðinar hjá Heilsufrøðiligu Starvstovuni, tí hon grundgav ikki nóg væl í síni niðurstøðu, og tí hon ikki hevði tikið atlit at hummaraveiðini í síni viðgerð.

Bakkafrost kravdi, at málið varð tikið til viðgerðar av nýggjum, tí Bakkafrost var als ikki hoyrt í viðgerðini hjá Vinnukærunevndini. Tað játtaði Vinnukærunevndin fyri beint áðrenn ólavsøku.

Men nú hevur Vinnukærunevndin staðfest sína niðurstøðu frá juni, og avgerðin hjá Heilsufrøðiligu Starvstovuni er heimsend.

SÍ EISINI Staðseting viðgerast av nýggjum

Tað merkir, at skal málið viðgerast av nýggjum. Hoyringarsvarið frá Bakkafrosti hevur sostatt ikki broytt niðurstøðuna hjá Vinnukærunevndini.

Orsøkina til tað, sigur Vinnukærunevndin vera, at niðurstøðan bygdi á sjálva viðgerðina hjá Heilsufrøðiligu Starvstovuni og ikki viðurskiftini hjá Bakkafrosti.

Avgerðin hjá Vinnukærunevndini merkir, at Heilsufrøðiligu Starvsstovan noyðist enduskoða sínar mannagongdir, tí Starvsstovan hevur gjørt nógvar líknandi niðurstøður, segði Bárður enni við útvarpið 30. mai.