Tulkingar elva til seinkingar

Skjótt eru sjey mánaðir síðani, at Løgtingið samtykti, at hjúnabandslógin skuldi broytast 1. desember í ár. Men so verður ikki.

Broytingarnar eru ikki lýstar enn. Ein orðing í einari lógargrein skal broytast fyrst. Og semja er ikki í Føroyum um, hvør eigur broytingina, føroyingar ella danir. 

Lógarbroytingin ikki virkin enn

Ivin um grein 14, annað stykki, í hjúnabandslógini liggur framvegis í buktini. Hjúnabandslógin, sum Løgtingið síðst í apríl samtykti at broyta til frama fyri samkynd, er tí ikki farin at virka enn.

Nú hevur Løgmansskrivstovan spurt Forsætismálaráðið, um tey hava somu tulking sum Løgmansskivstovan. Hon er, at málsøkið er føroyskt og broytingin skal tí gerast við løgtingslóg.

Grein 14, annað stykki, í hjúnabandslógini sigur, at prestur í fólkakirkjuni kann signa borgaraliga gift.

SÍ EISINI Ósamd um lógarbroyting

Hetta eigur ikki at vera galdandi fyri samkynd, sum eru borgaraliga gift, ætlar Løgtingið.

Almanna- og innanríkismálaráðið í Danmark sigur, at tá hetta er avgreitt í Føroyum - tí fólkakirkjan er yvirtikin - verður fyriskipanin um hinar broytingarnar í hjúnabandslógini sett í gildi, soleiðis sum Løgtingið samtykti, og broytingarnar fara at virka. 

Men sambært frásøgn frá fundi 2.september í føroyska Heilsu- og innlendismálaráðnum um broytingarnar í hjúnabandslógini er ikki semja í landsstýrinum um júst hasa broytingina, um føroyingar eiga hana ella danir.

Sent til ummælis í øðrum ráði

Danir og Løgmansskrivstovan siga, at málsøkið er yvirtikið. Mentamálaráðið sigur, at grein 14, annað stykki, í hjúnabandslógini er danskt málsøki, tí hjúnabandslógin er donsk. 

Løgmansskrivstovan spurdi síðst í oktober Forsætismálaráðið, hvat tey har halda, um føroyingar eiga broytingina ella danir.

Forsætismálaráðið hevur sent málið til ummælis í Almanna- og innanríkismálaráðnum og í Kirkjumálaráðnum.

SÍ EISINI Hjúnabandslógin til hoyringar í Føroyum

Broytingarnar í hjúnabandslógini koma ikki í gildi, fyrr enn grein 14, annað stykki, er broytt, so samkynd, sum eru borgaraliga gift, ikki kunnu biðja prest signa seg.

Grein 14, annað stykki, í hjúnabandslógini sigur, at "Ægtefæller kan få et ægteskab, som er indgået ved borgerlig vielse, kirkeligt velsignet af en præst i folkekirken."

Løgmansskrivstovan spyr Forsætismálaráðið, um tað er samt við Almanna- og innanríkismálaráðið, ið sigur, at tá Føroyar yvirtóku fólkakirkjuna í 2007, yvirtóku Føroyar lóggevandi og útinnandi valdið viðvíkjandi grein 14, øðrum stykki, í hjúnabandslógini.