Rættarnevndin: Hon ger dygdargott arbeiði

Løgtingsins umboðsmaður ger eitt dygdargott arbeiði.

Tað sigur ein samd rættarnevnd í álitinum til uppskotið hjá formansskapinum um at góðkenna frágreiðingina hjá umboðsmanninum fyri 2015.

Rættarnevndin heldur, at viðgerðin í rættarnevndini av frágreiðingini frá umboðsmanninum, og í løgtinginum yvirhøvur, eigur at vera á einum yvirskipaðum stigi.

Tí eigur løgtingið ikki at fara upp í viðgerðina av einstøkum ítøkiligum málum. Annars kann tingið órógva og sáa iva um mannagongdir og avgerðir hjá umboðsmanninum, sigur rættarnevndin.

Hetta er 15. ársfrágreiðingin frá umboðsmanninum.

Formansskapurin í løgtinginum avgjørdi í summar, at ársfrágreiðingarnar hereftir skulu leggjast fyri tingið sum uppskot til samtyktar. Eftir fyrstu viðgerð skulu tær beinast í rættarnevndina.