Føroysk listafólk á mentanarstevnu í London

Føroyar eru við í norðurlendska mentanarfestivalinum Nordic Matters í London, sum byrjar í kvøld.

Føroysku listafólkini eru Kristina Sørensen Ougaard, sjónleikari, Jens L. Thomsen, myndlistamaður, Lena Andersen, sangari, Randi Samsonsen, klædnasniðgevi og Durita Holm, rithøvundur. 

Onnur føroysk listafólk fara væntandi at leggjast afturat næstu mánaðirnar, upplýsir Mentamálaráðið.

Rigmor Dam, landsstýriskvinna, umboðar Føroyar, tá festivalurin verður settur í kvøld. 

Nordic Matters verður alt hetta árið. 

Føroyska sendistovan í London, Norðurlandahúsið og Mentamálaráðið hava fyrireikað føroyska partin í festivalinum.

Norðurlendska ráðharraráðið hevur sett av fimm milliónir krónur til Nordic Matters, sum er í Southbank Centre. 

Í sambandi við setanina í kvøld eru norðurlendsku mentamálaráðharrarnir bodnir at siga sína hugsan um børn og ung, burðardygd og javnstøðu millum kynini.