Leirvíkingar skulu sparka á innandura graslíki

Íbúgvar í Eysturkommunu skulu hava ein innandurða fótbóltsvøll - tað ætlar í øllum førum Jóhann Christiansen, borgarstjóri. Ætlanin er at inniloka núverandi vøll í Leirvík. 

Býráðið í Eysturkommunu gjørdi í fjør av at seta 200.000 krónur av á fíggjarætlanini til eitt kanningararbeiði í samband við at inniloka vøllin í Leirvík. 

Men tað skulu brúkast nógv fleiri pengar, um verkætlanin skal gerast veruleiki: Verkætlanin mett at kosta í minsta lagi 40 milliónir krónur.

Men hóast høga prísin, er ætlanin, sambært borgarstjóranum, væl móttikin millum tey, sum skulu rinda - nemliga skattagjaldararnir í Eysturkommunu. 

Í holt í summar

Enn er kanningararbeiði ikki liðugt, men Jóhann Christiansen væntar at leggja ætlanina fyri býráðið í summar.  Men nær vøllurin verður liðugur, er ikki vist. 

Og hóast ætlanin um at gera ein innandurða vøll fyrst og fremst kemur fótbóltinum til góðar, er ikki óhugsandi at fleiri aðrar ítróttagreinir fáa innivist, um verkætlanin ber á mál. 

"Her skal vera pláss fyri øllum frá fótbólti til bogaskjóting", sigur Jóhann Christiansen