Astrup og Betri Banki gjørt semju

Tað ber í sær, at Betri Banki tekur stevningina móti Jørn Astrup Hansen aftur. Tað boðar Betri Banki frá í tíðindaskrivi fyri lítlari løtu síðani.

Sambært tíðindaskrivinum váttar Jørn Astrup Hansen í semjuni, at hann hevur ikki ætlað at skuldsett bankan og leiðsluna í bankanum fyri at hava roynt at framt skattasvik.

Jørn Astrup Hansen hevur heldur ikki roynt at sagt, at bankin við vilja hevur givið TAKS skeivur upplýsingar við tí endamáli at fáa skattafrádrátt.

SÍ EISINI Eik stevnir Astrup

Jørn Astrup Hansen harmast um, at leiðslan í bankanum hevur fatað atfinningarnar soleiðis, stendur í tíðindaskrivinum, Betri Banki hevur sent fjølmiðlunum.

Betri Banki er síðani komin til ta niðurstøðu, at tað ikki longur er grundarlag at halda fast við stevningina móti Jørn Astrup Hansen.

Bankin hevur tí gjørt av at taka sakarmálið aftur. Partarnir hava avtalað ikki at gera fleiri viðmerkingar í málinum, stendur í tíðindaskrivinum frá Betri Banka.