FBI-gølan heldur fram

Pressutalsmaðurin hjá forsetanum, John Spicer avsannaði í gjár søgur í amerikanskum miðlum um, at forsetin bað um trúfesti ella loyalitet frá FBI-stjóranum undir einum døgurða teirra millum í januar.

Sambært The New York Times hevði FBI-stjórin givið forsetanum lyfti um reinlyndi, men ikki trúfesti.

Amerikanski forsetin hevur verið fyri hvøssum atfinningum, síðani hann týsdagin koyrdi FBI-stjóran frá, samstundis sum FBI er mitt í rannsóknum um, hvussu tætt sambandið var millum Trump-leguna og Russland undir forsetavalstríðnum.

Eisini hevur tað, at forsetin er so virkin á sosiala miðlinum Twitter, oyst bensin á bálið. Trump hevur m.a. skrivað, at frákoyrdi FBI-ovastin "sanniliga má vóna, at ongar upptøkur eru" av samrøðuni teirra millum.

Krevja avrit av upptøkum

Á dagliga tíðindafundinum í gjár noktaði pressutalsmaðurin hjá Donald Trump at svara, um forsetin hevur loyniupptøkur frá Hvítu húsunum.

Eisini vísti pressutalsmaðurin frá sær, at tweetið hjá forsetanum skuldi skiljast sum ein hóttan móti James Comey.

Útsagnirnar hjá forsetanum elvdu beinanvegin til samanberingar við fyrrverandi forsetan Richard Nixon, sum tók samrøður upp í Hvítu húsunum, og sum skundaðu undir, at hann noyddist at leggja frá sær undir Watergate-gøluni.

Leiðandi demokratar í Umboðsmannatinginum kravdu í gjár skrivliga, at Hvítu húsini lata teimum avrit av øllum upptøkum.

Í brævinum skriva John Conyers and Elijah Cumming: "Tað er eitt brotsverk at ræða ella hótta møgulig vitni við tí fyri eyga at ávirka, seinka ella forða fyri teirra almenna vitnisburði", skrivar BBC