Loysa ivamál um Hoyvíkssáttmála í august

Ivamálini um Hoyvíkssáttmálan millum Føroyar og Ísland skulu loysast í august.

Tað er fráboðanin eftir ein fund í Havn mikudagin millum landsstýrismenninar Poul Michelsen og Høgna Hoydal og íslendska uttanríkisráðharran, Guðlaug Þór Þórðarson.

Hoyvíkssáttmálin er fríhandilssáttmáli, sum Føroyar og Ísland gjørdu í 2006.

Í Føroyum er misnøgd við sáttmálan, tí føroyingar halda seg fáa ov lítið burtur úr honum.

Endurskoða sáttmálan

Í fjør varð avgjørt at endurskoða sáttmálan.

Føroyar hava leingi viljað útflutt heilivág til Íslands, men tað hevur ikki borið til higartil.

Ísland er í EBS-samstarvinum millum ES og EFTA, og kann tí ikki innflyta heilivág ella aðrar apoteksvørur úr Føroyum, segði Guðlaugur Þór Þórðarson, uttanríkisráðharri, umborð á Brimli í gjár:

Ráðharrin vónar, at Føroyar fara at kunna útflyta heilivág til Íslands, tí tað er tað rætta.