USA harmast lekan av loyniligum upplýsingum

Tað sigur amerikanski uttanríkisráðharrin, Rex Tillerson, sum hevur havt fund við bretska starvsfelagan, Boris Johnson.

- Vit átaka okkum fulla ábyrgd og harmast sjálvandi tað, sum hevur hent, segði Tillerson á tíðindafundi í London.

USA er lekin

Eitt lítið samdøgur eftir hendingina í Manchester komu loyniligar upplýsingar fram í amerikansku pressuni.

Sostatt vóru tað ikki bretskir myndugleikar, sum í fyrstu atløgu kunngjørdu navnið á 22 ára gamla, Salman Ramadan Abedi, sum verur hildin at hava skipað fyri atsóknini. Bretski innanríkisráðharrin, Amber Rudd, fanst alt fyri eitt at lekanum.

Seinni vísti New York Times loyniligar myndir av granatpettum, sum vóru funnin í forhøllini í Manchester Arena, har Abedi sprongdi seg sjálvan í luftina.

Ivasamt samstrarv

Tað fekk borgarstjóran í Manchester, Andy Burnham, at siga, at Bretland tordi ikki at lata amerikanarum upplýsingar um yvirgangsatsóknina.

Samstarvið er kortini tikið uppaftur, eftir at USA hevur vissað Bretland um, at ongar upplýsingar skulu leka í framtíðini.

Atsóknin í Manchester kravdi 22 mannalív.

Bretskir myndugleikar stúra fyri fleiri atsóknum, og tí er trygdin í landinum hækkað upp í hægsta stig.