Skulu kunna skiljast í Føroyum

Sama dagin, tað er leygardagin í næstu viku, 1.juli, sum samkynd kunnu blíva vígd í Føroyum, kemur eisini í gildi broytingin í føroysku rættargangslógini, so samkynd, sum verða gift í Føroyum, eisini kunnu verða skild her.

Neyðugt var at broyta rættargangslógina fyri at tryggja, at samkynd, sum eru gift í Føroyum, men flyta í eitt land, har sum samkynt hjúnaband ikki er loyvt, skulu kunna verða skild í Føroyum.

Um samkynd, sum eru gift í Føroyum, flyta í eitt land, sum ikki góðtekur samkynt hjúnaband, vilja skiljast, ber tað ikki til í landinum, tey búgva í, tí har er samkynt hjúnaband ikki til í nakrari lóggávu, heldur ikki um hjúnaskilnað.

Við lógarbroytingini, sum kemur 1.juli, skulu tey kunna fara aftur til Føroya og fáa Føroya rætt at skilja seg.

Løgtingið samtykti broytingina í rættargangslógini longu 29.apríl í fjør. 

Herfyri varð hon eisini samtykt í fólkatinginum.